- Yon komite
tou nèf ki gen tèt li Majistra Senmichèl Latalay la, M. Gueillant Dorsainvil,
pran rèn Asosyasyon Majistra Latibonit yo (AMA). Nan tout nivo, Nouvo prezidan an di li angaje l’ pou
ranfòse Asosyasyon an.
- Prezidan sòtan AMA a, M. Frantz Ulysse, eksprime
satisfaksyon li pou travay li reyalize pandan 2 manda li fè nan tèt asosyasyon
an. Majistra Senmak la raple, gras ak efò administrasyon li an, AMA gen yon estati
legal, yon kont bankè ak machin pou faisilite travay manb li yo.
- Majistra Minisipalite Dedin nan, M. Ernst Saint-Phard, kritike
karaktè klanik administrasyon Jovenel Moïse la. Otorite a fè remake si yon mèri
pa gen akwentans ak ekzekitif la, lap difisil pou li benefisye sibvansyon kap
ede l akonpli misyon li.
- Aprè verifikasyon otantisite pyès li yo, Yonn nan Senatè
Latibonit yo, Doktè Carl Murat Cantave, envite Premye Minis nome a, Notè Jean
Henry Céant, chita pale ak tout gwoup konsène yo avan li antame fòmasyon
gouvènman li an.
- Touswit aprè ratifikasyon li, nouvo Premye minis la dwe
komanse reflechi sou finalizasyon pwosesis eleksyon endirèk yo ki enpotan anpil
pou desantralizasyon sèvis piblik yo, daprè
Kodonatris Platfom fanm oganize pou devlopman Latibonit la, Madam Louisette
Vertilus.
- Ansyen kandida malere pou pòs Depite sikonskripsyon
Gonayiv la, Madam Mikerlande Legros
Metellus, plede an favè entegrasyon fanm yo nan tout espas desizyon yo anndan
administrasyon piblik la.
- Komisarya
jiridiksyon Desalin nan, ba Latibonit, resevwa yon pikòp okazyon nan men otorite
politik yo nan rejyon an. Vis Delege awondisman an, M. Wadner Joseph, ki te
pran lapawòl nan okazyon an, deklare nouvo veyikil sa pral rann fòs lòd yo pi
efikas nan sèvis yap bay popilasyon an.
- Responsab Komisarya
Desalin nan, Komisè David Edren, remèsye tout otorite ki kontribye nan demach
yo. Selon Ofisye polis la, plis enstitisyon an gen materyèl se plis lap bay bon
rezilta.
- Nan kad
reouvèti klas yo ki prevwa pou 3 septanm kap vini an, Platfòm Sendika Anseyan Latibonit yo reklame
yon « Vas pwogram akonpayman » pou paran ak anseyan yo. Nimewo 1
estrikti a, Pwofesè Didier Pierre, mete anpil aksan sou sibvansyon manyèl
eskolè yo ak amelyorasyon kondisyon travay kòlèg li yo.
- Pou yon dezyèm
fwa, lansman ofisyèl Brigad entevansyon rapid nan zòn ki gen dlo yo (BIRMA)
repòte. Kodonatè Rezo Nasyonal pechè ak Agrikiltè yo (RENAPA), M. Choudlet
Metayer, fikse nouvèl dat la pou mèkredi 29 out kap vini an.
- Komisè Marie
Dieunane Joseph Borgelin se nouvo responsab ki enstale nan tèt komisarya Okay la,
ayè lendi 13 out 2018 la. Li ranplase
nan pòs sa Komisè prensipal Saintyl Rousseau.
- Nan jiridiksyon Pòdepè, asiz kriminèl avèk asistans jiri ki
te demare 06 dawout pase a pran fen lendi 13 out 2018 la. Selon dekana Tribinal
premyè enstans resò a, gen 6 endividi ki kondane ak yon lòt ki jwenn liberasyon
l’.
#ENFO96
Commentaires
Enregistrer un commentaire